نفسك ….صادقها وأعشقها

 بقلم زينة الالوسي
قبل فترة حدث نقاش حول موضوع معين في مكان معين وبطريقة معينه وهذا دفعني الى التفكير بالتالي:
قد أكون مختلفة بطريقة تفكيري عن الكثيرين في مجتمعنا نساء ورجالا وقد يكون لي نظرة خاصة وطريقة معينه في التعامل مع الناس عموما  والأشخاص المحيطين بي والمقربين لي في حياتي خصوصا واسلوب مختلف عن معالجة الكثير من المواقف اللي امر بيها او يمر بيها الناس المحيطين بيه او رأي مختلف وطريقة مختلفه تماما في تفسير الامور وفهمها وتحليلها عن رأي الكثيرين في مايعتبره المجتمع ضمن الاطار العام او المقبول او الشائع وقد يعترض الكثيرين…. ويختلف البعض….وينتقد الاغلبيه ويعتبرها القله تحرر فكري!!!! وليس بالمعنى الحقيقي للتحرر الفكري (شفايتلي) وانما بما تحمله الكلمه في مجتمعاتنا العربيه عموما ومجتمعنا العراقي خصوصا من انحطاط وانعدام الاخلاق وأسفاف وغيرها من الصفات السلبيه….وقد وقد وقد وقد ولكن أسمحولي اگوللگم الآتي مع خالص التحيه والمودة والحب والأحترام والتقدير….
أولا: بكيفي اي بكيييييييييييييفي دماغي واني حرة بي وحياتي وأعيشها مثل ما أريد وبالطريقة اللي تسعدني وترضيني وتريح ضميري وبالي وعقلي وروحي.
ثانيا: الناس اللي بحياتي واللي حواليه والمقربين مني واللي يشكلون جزء مهم وكبير في حياتي يعرفوني ويحبوني بدون اي مصالح او مخططات وبدون اي تمثيل وتصنع وفاهميني صح وفاهمين طريقة تفكيري ويحترموني ويقدروني.
ثالثا: طالما من أحط راسي على المخدة بالليل ودماغي وعقلي وروحي وضميري مرتاحة واني ورب العالمين نعرف انه ما مأذية او جارحه او متجاوزة او ظالمه احد فهذا كل اللي يهم وهذا فعلا اللي ينحسبله الف حساب وحساب.
ببساطة ياجماعة الخير ويامحفوظين البگة والسلامة اني أنسانه أحب أبين مشاعري للناس اللي بحياتي واحب ادلعهم وادللهم واهتم بيهم من صمصوم صمصوم قلبي وبكل طيب خاطر وأهتم لكل تفصيله في حياتهم وأشاركهم بكلشي واكيد ومما لايقبل الشك وبدون أي نقاش مو للكل أو عمال على بطال يعني مافاتحتها جمعية خيريه للمشاعر والعواطف والحب والحنان وكلمن ناقصة عواطف عليه التوجه الى جمعيتنا…. لا ولا ولا ولا ولكن فقط وحصري ومخصوص للي فعلا يستاهلون وللي فعلا غاليين وللي فعلا طيبين وللي فعلا نفوسهم وعقولهم وگلوبهم نقيه وصافيه ونظيفة وراقية و واعية وللي فعلا موجودين برغم كل الظروف ومشاغل الحياة وللي فعلا يغزر بيهم الطيب وللي فعلا يقدرون الفعل الزين والوكفات الحلوة والكلمة الطيبة والمشاعر الصادقة وللي يدافعون عني بغيابي وأشد بيهم ظهري…. للي اوثق بيهم والجألهم من احتاج احد احجيله واشكيله وافضفضله واخذ رأيه ويسمعني بدون مقاطعة أو أستخفاف أو استهزاء ويشاركني بالرأي والقرار ويفهمني صح….للي ما أخجل او انحرج من ارائي أو معتقداتي بخصوص أي شي بالدنيا أو ابين اللي فعلا أشعر بي او أبجي او أضحك او اعصب او اغضب (ولو قليلا مايحدث شغلة الغضب والعصبية ولكنه يحدث بين الفينة والأخرى)  و أتصرف على طبيعتي وياهم…. للي احمد الله وأشكره الف مره ومره على وجودهم في حياتي وعلى الحلاوة والجمال اللي ضايفيها لحياتي ، كل هذه الاسباب والكثير والكثير والكثير والكثير غيرها أرجع واكول كونوا على طبيعتكم وتصرفوا وتعاملوا ويه الناس بالطريقة اللي تريحكم وترضيكم وكونوا مثلي وخلوا اخر همكم رأي الناس ورضا الناس وصيروا أصدقاء لنفسكم اولا قبل ماتصيرون أصدقاء للناس لأنه احنه من اكثر الناس اللي تحبنه وحبوا نفسكم وداروها واهتموا بيها ودللوها وأسعدوها بأبسط الأشياء حته تكدرون تحبون الناس اللي حواليكم وتدللوهم وتهتمون بيهم وداروهم وتسعدوهم صدكوني راح ترتاحون وراح ترفعون شعارات عديدة في حياتكم وراح تغيرون نظرتكم للحياة وتعاملكم وتفاعلكم ويه كل الاحداث اللي تمر بحياتكم  وراح تجذبون لأنفسكم والمحيطين بيكم كل اللي تشعرون بي وتحسوه وتفكرون بي من سعادة وحب وصفاء وجمال وتناغم وعلاوة على ماتم ذكره اعلاه فأنتم سوف تكيدون العذال والحاقدين والمتلونين والزاحفين والمتحولين واللي يضحكون بوجهكم بس همه حقيقتهم العكس تماما واللي مكضيها غيرة وقشبه ونميمه كيدا مقحما خطيرا شديدا و عظيم الشأن….كونوا اصدقاء وحبايب وعشاق ومغرمين لنفسكم وبنفسكم راح تصادقكم وتحبكم وتعشقكم وتغرم بيكم الدنيا والناس كلها.
زينة الالوسي - نفسك ....صادقها وأعشقها

4 آراء على “نفسك ….صادقها وأعشقها”

  1. الصراحة و الصدق مع انفسنا اولا و بالتالي مع الاخرين اهم الاساسيات لبناء مجتمع صحي و متحضر. Ghada taherعاشت ايدچ زوزو على طرح الموضوع.

    1. وانت العايشة غيدة حبيبتي وطالما أكو هيجي عقول ونفسيات حلوة فأحنه بخير اسعدني مرورج وتعليقج واهتمامج قلبي

  2. أعجبني جدا واسعدني
    طريقة الطرح رائعه وعفويه وبسيطة بحيث اني افتهمتها
    هاهاهاهاهاهاهاي
    ربي يسعد ايامك

  3. جميل الموضوع زينة وأحس تعبرين عن أفكاري لكن أنتي أفضل مني لأني لحد الآن أتعامل بتحفظ مع بعض الأشخاص الذين يعانون من مشاكل النقص لأن البيئة لها تأثير أحيانا سلبي بالذات على الفتاة بصورة خاصة احسنتي زينة حبيبتي دائما مواضيعك واقعية

اترك رداً على Zina إلغاء الرد