الى حلم

شعر ليث حمودي.

  

أنتخيلي

گطرة بسنين العطش تروي الشفايف

وأنتخيلي

همسة شفايف محب من عشگه خايف

وأنتخيلي

طيف وردي وذكرى حلوة

وليل سهران بحضن شاعر وغنوة

ودمعة يرسمها الخجل بخدود ترفة

وضحكة حديثات وي هوسات زفّة

ولهفة مسافر أجاه الشوگ طايف

وزف همومه بزفرة ودموع بچفايف

أنتخيلي

*****************

أنتخيلي

چلمة مواساة للمفجوع گلبه

وحسرة المظلوم لمّن ينخى ربه

ولوعة الخلـّص حياته بضيم غربة

ودمعة دمعه

نشفت اللوعات بديار الغريبة

وشمعة شمعة

ذابت سنيني بدمع گلبي ونحيبه

والشمع لو ذاب شيردّه ويجيبة

انتخيلي

*****************

أنتخيلي

آنه محتاجچ, حياتي بلا هواچ تصير خنگه

وهاي دنيانة الوسيعة تصير ضيگة

والسما الزرگة يوادعها الزراگ

والحنان تذبحه لوعات الفراگ

والحروف تموت من تخنگني شهگة

وروحي المذبوحة تنده بألف حـِرگة

أنتخيلي

************

أنتخيلي

مثل ما شفتچ أمل بأول زمان

بسمة تروي الروح بأصناف الحنان

وگطرة گطرة

گمتي تسگيني الفرح بس گطرة گطرة

وحسرة حسرة

مرت الساعات گربچ حسرة حسرة

حسرة من تضحك شفافچ للغرب

وحسرة من تجفين عني بلا سبب

وحسرة من نظرة عتاب

وحسرة هموم وعذاب

وحسرة من الگلب چان

يصرخ يريد الأمان

أنتخيلي ,,, أنتخيلي

 

بدأت بها يوم الأربعاء 28/12/2016 الساعه 1:50 بعد الظهر

انتهيت منها الخميس 29/12/2016 الساعة 10:30 مساء

4 آراء على “الى حلم”

  1. اول سؤال سألته من قريت هذه القصيدة الجميلة عن مدى السوداوية والحرمان. كعادته ليث يصنع من السواد مشرق بطريقة كتابته. عاشت إيدك يارائع

اترك رد