اعتراف

أي أحبك

گلبي هايم بيك كلش من زمان

ولو تدوّر بالشهادة

تلگى تاريخ الولادة

يوم شفتك وبنفس ذاك المكان

لمّن لهيبة جمالك

خِشعت أبصار الخلگ

ولمّن ببحر اللواحظ

گلبي بلهفة غِرَگ

ولمّن شفافك روتلي

أحلى ما بالكون من عذب الكلام

ولمّن أيدي الجاست أيدك

سكرت بخمر السلام

ولمّن الروح الحزينة

ذابت بدنيا الغرام

وفرفحت من دون چلمة

مثل جاهل حضن أمه

وصاحت بلهفة وحنان

أي أحبك كلش من أول زمان

*****

أي أحبّك

وأدري حظي وياك بالدنيا العذاب

وأدري تالي الشوگ بس لوعة غياب

وأدري بالدنيا نصيبي وياك دمعة

حتى لو أشعل سنين العمر شمعة

لكن الدلّال حاكم يفرض أمره

والعشگ سلطان جاير طول عمره

وروحي مرهونة بهواك

تنتظر رحمة رضاك

وأنت يا أصعب سهل شفته بحياتي

كل شي ما يرضيك بس لوعات گلبي

وحتى لو أسكيگ من نهران حبي

شهد صافي وتمر برحي

تعتني بكل عين صلفة

بضحكة حلوة وأيد ترفة

وتترس بملح الفراگ شفاف جرحي

وحيل ازم شفافي واصرخ

كافي يلصدّك سباها الروح كافي

وشنهي ذنبي البي تعابيني وتجافي

وشنهي أحط للزاد لمّن ملحة يمصَخ؟

كافي أحبّك ولك كافي

أي وحگ رب البلاني بيك بلوة

آني أحبّك ما اعوفك هيّ گوّه

*****

أوف من ظلم الولف لمّن جماله

يطغى ويزيد بدلاله

أحلى من تفاح خدّه

بشفته ذابت ألف ورده

وعسل صافي تگول ريگه

وحقّه لو يدلع غنج رمّان زيگه

وآخ من خصره اذا من يمنه فات

يسلب بسحره الحياة

وتخضع لحكمه الطغاة

وآنه بيك من الجِدَم للراس هايم

وما يهمني شمايلوم البيك لايم

آني أحبّك

***************************************************************

قصيدة “إعتراف”
شعر: ليث حمودي

موسيقى: معزوفة “لو “
تأليف، عزف وتوزيع:  أحمد طاهر

فكرة الفيديو، التصميم والاخراج: أحمد طاهر

 

رأيان على “اعتراف”

  1. أوف من ظلم الولف .. الكتابه عن المشاعر اشوفها من الأشياء الصعبة بس حقيقة أبدعت ليث، بالمناسبة شنو تعني كلمة “روتلي”.
    احمد كلش حلوة الموسيقي، نريد بعد ?

اترك رد