موضوع فرح

بقلم اسماء الشالجي.

اليوم موضوع الطفلة فرح صار موضوع راي عام وهذا الشي يفرحني وثبتلي ان الانسانية موجودة ببلدي وبين اهلنا وثابتة بيهم الغيرة العراقية سواء داخل البلد او خارجه …واكو ناس كومة دكت بابنا واتمنوا يتبنون هذه الطفلة من غير الي سمعناه من شيخ الامارات او الفنانة احلام الي بادروا بتبنيها

بس ….ترة الموضوع مو بس فرح اكو اهواية مثل فرح بهذا الدار. اكو امهاتهم موجودين واباؤهم موجودين بس شامريهم بالدار. الام شمرت ضناها علمود رجال اتنام بحضنه والاب شمر ضناه علمود يرضي زوجتة الثانية. عذرا للكلام بس هذا واقع…. الي يقهرني اكثر العالم عافت مصيبة الايتام والاهل ويحجون على الدار تدرون انتو هذا الدار احن عليهم حتى من اهلهم الي شمروهم. تدرون البنات ذاك اليوم شافوا مديرتهم السابقة بالشارع عبالك شافو امهم … معتنين بيهم واحسن عيشة عايشين من تعليم وترفيه وتربية ونظام بفضل القائمين عليه وبفضل اهل الخير ومتحملين مسؤولية بس الله يدري بيها فعيب يجي واحد او وحدة تنتقد الدار او تنطني اراء سلبيه بحقة…

فرح بخير وسعيدة وحالها احسن من جانت ابيت جدها الكل يحبوها ويداروها وجهزوها بكلشي ودخلوها مدرسة حالها حال البقيات بالدار …اليوم رحنا وشفناهم

الي يريد يساعد ويتكلف…خلي يتكفل كل الي بالدار رجاءا حتى لا ينقهرون البقية ويشعرون بعدم اهتمامكم بيهم ويتكفل كل يتيم سواء كان بمؤسسة او دار او يم بيتهم فاما اليتيم فلا تقهر.

شكرا استاذ غسان الكناني واستاذ قحطان وست منيرة وست نهلة انتو رمز الانسانية وانتم اهل لهذه المكانة ربي يوفق

اترك رد