الى سراب

العنده مثلك بعد من ربه شيريد

​​عايش بجنة عدن قبل الحساب

خير مليانة حياته بلاية ضيم 

​​واخذ باليمنى الفرح وية الكتاب

هاك جَنتَك الله گـلّه وبيها عيش

​​ولا تخاف الموت والهم والعذاب

من عسل صاغك الهي ومن طحين

​​وخلّه ويه العسل چم ذرة تراب

ومن حرير الشعر نازل عل چتاف

​​يرگـص وي الريح لو هب منها هاب

عيونك الياقوت من عدها يغار

​​وبخجل يحسدها من خلف النقاب

طولك بساتين تزهي محمّلات 

​​من لذيذ الزاد ما لذ وطاب

خمرة شفافك اذا تحـچـي تسيل 

​​​شـگـد تمنيت اسكر بخمر الرضاب

لو مشيت الـگـاع تخجل من خطاك 

​​     ودگــة جدامــك تفـك لـلفرحة باب 

يا سراب الروح عطشانة لهواك 

​​نبع يرويها تريدك مو سراب

 

*********

قصيدة بقلم وصوت ليث حمودي
الفيديو فكرة وتصميم وأخراج أحمد طاهر