هنا بغداد

بعدسة وسام العكيد

شعر لبيد هاني (قصيدة هنا بغداد)

طبع حبنا سوالف ليل من تنعاد
تهمس للكمر حول هنا بغداد
ما مشتاك .. صار سنين نتنخاك
لعيون ودمعها .. تقرب الميعاد
دجلة وموجة ينطر .. ضيك
وكم ليل مر وانت مبعد يا كمر بس عاد
حول يا كمر .. حول هنا بغداد حول ياكمر
لا تشمت الحساد
حول .. جرف دجلة مضيع الاحباب
وجلسات السمر ومايل الاوراد
وشوارعها صفت .. تيزاب
واليمشون شموع تذوب
صاروا بيهة كوم رماد
وكهاويها صفت حصران لا انسان
مر بيهة ولا جائع تهنة بزاد
ولا سوق السراي تحنة باليحجون
ولا المربعة رجعت تحسب الرواد
ولا باب المعظم تنطر الركاب
ولا صبح العلاوي يهلي بالوفاد
صفت دجلة ونواسيها وشواطي الليل
تسال عاليمر .. وتكله ابعد غاد
ليل اظلم شكلك يا كمر ويطول
هم نكظي العمر خوف وحزن وحداد
لا جاي العصر ومسامر النسوان
بس مصايح الموت وبجي الويلاد
بس الموت واشلاء ويتامى تصيح
رصاص وهاونات وثار من بعاد
جن بلا عقل صرنة .. ولا عقال
واحنة اللي عقلنة يقود الف بلاد
تقسمنة وسلاح الاجنبي بلا ايد
بيدينة ويحركنة بلا مرصاد
شكلك ياكمر .. من يومها لهاليوم
شما تطلع علينة قهر موش اعياد
سفينة احنة صفينة .. وضيع السفان
من كثر الهموم النجر صاح الداد
اطلع ياكمر اطلع هنا بغداد
اهل غيرة وشهامة وتجربة وعناد
علمنة الزمان وعلم الاكوان
درسنة ومكتبتنا احنة الة رواد
اطلع يا كمرخل ترجع الايام
ترانا احنة مدار الدنيا من تنقاد
احنة اللي زرعنة الشمس هذا النور
واحنة اللي نضوي النجم ما يزداد
طبع حبنا سوالف ليل من تنعاد
تهمس للكمر حول هنا بغداد
————————————–

اترك رد