العنوسة المقنعة

بقلم ليلى طارق الناصري.

مرحبا أحبتي …اليوم سأتناول موضوع قد يبدو مكرر كثيرا وقد ينزعج البعض من مجرد قرأة العنوان الا أنني سأتناول العنوسة من منظور أخر وهو ناتج من تجربتي الشخصية المتواضعة لكنني أحببت مشاركتها معكم ربما تنال إستحسانكم وسأكتب باللهجة والعامية في بعض الأجزاء لأنني سأنقل بآمانة بعض الحوارات التي دارت بيني وبين العوانس العزيزات .

العنوسة لغويا هي مفردة تطلق على الرجل والمرأة اللذان لم يتزوجا بعد وقد كبرا بالعمر وفاتهما قطار الزواج بالعرف الاجتماعي أو حسب معايير المجتمع اللذان ينتميان إليه

العانس بالمعنى الاجتماعي الدارج هي حصرا للفتاة او الأنثى التي لم تتزوج وفاتها القطار كما يقولون.

العانس في مجتمعنا ومنذ نعومة اظفري توصف بكل الصفات السلبية  …مثلا  فضولية ,نكدية, حسودة, نمامة, غير متعاونة, لئيمة, بخيلة غير ناجحة أجتماعيا وألخ ألخ  والمصطلح العامي لها ( معقدة ) المهم كلما كبرت كلما أصبحت أقارن  وأجد التناقضات تتبلور وتتوضح أمامي و أسؤ ما مررت به من نماذج نسائية ( معقدة)وتعاني من ( العنوسة ) إذا أتفقنا على أن العانس تتسم بالصفات التالية :

  • طالعة الدنيا من عينها وتكره حتى روحها.
  • فضولية وحشرية ونمامة.
  • فاشلة أجتماعيا
  • تكره أي وحدة شابة وحلوة وبعدها روحها خضره
  • تتعارك ويه ذبان وجهها
  • تغار من كل شي وبلا سبب
  • كئيبة وسلبية وعلى طول الخط
  • تتهم الرجال بأسؤ الصفات ودوماهجومية ضده
  • دوما تبحث عن ضحية لها تتسلط عليها وتمارس ضدها كل أنواع الاضطهاد الممكنة (أطلع عقدها براس أحد بنتالجيران بنت اختها او ابن اخوها لو طالب عندها بالصف لو موظف زميل لها وخصوصا اذا كان حباب و مؤدب وما يجاوب).

إذا اتفقنا ان هذه هي أهم صفات العانس أو العانس تتوفر بها على الأقل خمس او ست صفات منها فأنني أسؤ أنواع العوانس التي واجهتها بحياتي ومروا علي سواء بحياتي المهنية أو الشخصية كانوا من المتزوجات !!! نعم أحبتي كانوا من المتزوجات والمتزوجات حصرا

يعني من صرت أصادف أحداهن وهي بشوشة الوجه وتضحك للهوا الطاير مثل ما يقولون أهلنا ومهتمة بنفسها وتحب الدنيا  وواثقة من نفسها ومتصالحة معها ومرتاحة نفسيا ولذلك ما تغار أذا جاءت شابة أخرى للعمل  أو اي مكان اخر حتى لو هذه الشابة الاخرى توأم الفاضلة مريم فارس  أو المحترمة نانسي عجرم ولا الحجية هيفا وهبي ويظل وجهها يضحك وتشتغل ومتونسة غالبا تكون ما متزوجة.

أما المتزوجات التي واجهتهم في مجال عملي أو في حياتي العملية أو الشخصية  ( طبعا أستثني صديقاتي الرائعات لأنهن عملة نادرة )

فكلهن كانوا عوانس وبامتياز للأسف وكانوا يتعاملون بلا شفقة ولا رحمة مع الصغيرات الشابات اللاتي يلتحقن بالعمل معنا وكلما أمعنت النظر كلما كبرت دهشتي لماذا ؟؟!!!

بطبعي اجتماعية وأحب الخلطة وجو العمل عندي يتطلب علاقات ودية والتفاعل يعني ممكن أساوي قهوة صباحا واسكب فناجين أضافية و أقول تفضلوا ممكن أشتري بسكوت وأوزعه  لأن دوامنا طويل ونحتاج نأكل ايي شي حتى نجدد الطاقة فأجد أحدى المتزوجات ( العوانس الكريمات) تأتي وتطلب التحدث ألي على جنب كي تنصحني :

ليكي ليلى لا تحكي شي عن عيلتك وجوزك قدامها لتحسدك!!!!!!!

أو تأتي أخرى تطلب مني : لا تحكي شي قدامهن عن الجواز والاولاد حرام تقهريهن على حالهن!!!!

طالبات غريبة عجيبة طيب ليش ليش؟؟؟

من قال انها تحسد المتزوجة؟! من قال ان الغير متزوجة لئيمة وتتمنى زوال النعمة مني؟!

من قال أنها تنقهر على حالها و تأسف وتندب حظها لأنها لم تتزوج؟!؟

طيب هي الى الآن تضحك وتبتسم وبشوشة ومتفائلة ليش أنتو فاقدتوا القدرة على الضحك والتفاؤل؟

تردون بسبب المسؤولية والاطفال والتربية والزواج ألتزام مرهق وكنا مدللين بيت ابونا وتورطنا بالزواج!!!! طالما الوضع هو هكذا والزواج ورطة على شنو راح تحسدج المسكينة؟!!!

اذا كان الزواج مزعج ويفقد الوحدة حريتها وابتسامتها وثقتها بنفسها ويرهقها بالمسوؤليات والخ ونساكم طعم الفرح وكل ما تشوفي وحدة رشيقة ولا أنيقة ومهتمة بحالها بينهز بدنك غيرة وغيضا خايفة منها تحسدك على شو دخلك على شو؟؟؟ ( عذرا لبعض الكلمات باللهجة العامية الشامية بس لأنني انقل ما يدور حولي وانا اعيش في الشام)

المتزوجات صدقوني أغلبهن الا ما رحم ربي يعانين من الجفاف العاطفي وبلادة المشاعر والقسوة بالتعامل مع نفسها والاخرين صفات ما صادفتها مع غير المتزوجات وممن يصطلح عليهن فاتهن قطار الزواج.

وهذا له عدة أسباب تتعلق بعلاقة الزوجين ببعضهما ودور الزوج الخطير بزرع الثقة الزوجية وجعل الزوجة سعيدة ومطمئنة على حالها وحال بيتها وكذلك إذا الزوج كان سلبيا ولم يقم بدوره كما يجب سينتج عن ذلك ( العنوسة المقنعة ) لزوجته ومن ثم ينتج عنه أمور سلبية في الأسرة وتؤثر على المجتمع ككل مثل الخيانة الزوجية أو الشك المرضي أو عدم الرضا عن العلاقة بين الزوجين وغيرها من الأمور التي تولد مشاكل أسرية واجتماعية يعجز المجتمع عن التعامل معها بشكل صحيح ودوما المجتمع الشرقي هو مجتمع  ذكوري ولا يكون منصف بحق المرأة سواء كانت متزوجة أو لا إلا أن الغير متزوجة أو المنفصلة هي ذات النصيب الأكبر من هذا الإجحاف والظلم الاجتماعي

Please follow and like us:

احسنوا الظن

بقلم زينة الالوسي

‏معظم خلافاتنا مع من حولنا تقع بسببين:
مقصود لم يُفهم..
مفهوم لم يُقصد..

والحل بخطوتين :
استفسر عن المقصود..
وأحسن الظن بالمفهوم.

الاستماع والانصات الجيد وبهدوء هما الخطوة الاولى لتجنب الخوض بنقاشات حادة ومتأزمة و النطق بعبارات رنانه في غير محلها والتجاوز والاساءة للمقابل بسبب الفهم الخطأ …. ففي حال عدم وصول كلام او رأي او سؤال المقابل بصورة صحيحة فعلينا وبكل بساطة الاستفسار والسؤال عن المقصود (بدون زحمه شنو تقصد بهذه العبارة او شنو جان قصدك من گلت كذا وكذا) قبل ان نبدأ (نبلش ونحمی وتاخذنا الحميه والغيرة ونبدي نهتف ونخطب) ونرد بأسلوب هجومي واحنه اصلا فاهمين الموضوع او الفكرة او السؤال غلط تماما وبعيد كل البعد عن المقصود وتتأزم الامور وتاخذ مجرى وحجم واهمية مالها داعي …. الحياة بسيطة وسهلة وحلوة بكل جوانبها فمن اراد ان يستمتع بها ويعيش بسلام وطمأنية وراحة بال ماعليه الا تسهيل الامور وتجاوز المثير مما يقال من حوله والتغليس والتطنيش على الامور التافهه وعدم الوقوف عند كل فعل او قول واخذ الامور بحسن نية (بس مو معناها يصير قشمر وملطشة للرايح والجاي وينضحك عليه) لا ابدا… يكون فطن وذكي ولكن يحسن الظن ويتوقع الجيد ويخلي توكله على الله ويحمده في السراء والضراء ويسهل الامور حتى تتسهل الحياة واللي يريد يأزم الامور ويعقدها فيسوي العكس تماما يوكف على كل تصرف وكلمة وردة فعل لأتفه الامور واسخفها ويعيش في دوامة الشك والظن السيء والتدقيق والتمعين في كل صغيرة وكبيرة ولعن الحظ والدنيا على كل الامور اللي تصيرله في حياته… تفائلوا بالخير تجدوه واحسنوا الظن وتوكلوا على الله.

الصورة:   grist.org

Please follow and like us:

الچنّة والعمّة

بقلم عذراء عدنان

مساكم الله بالخير عيوني اليوم حنسولف سالفة عراقية بحتة وطبعا هي سالفة أزلية ولا يخلى بيت عراقي منها وهي سالفة العمة والچنّة ومثل ما يقول مثلنا الشعبي (لو العمة رضت على الكنة جان إبليس دخل الجنة) علاقة غريبة صدقا مثل علاقة توم وجيري فمثلا العمة تقول لبنتها كعدي عيني شنو نايمة للظهر وطبعا (احجي وياج يا بنتي واسمعج يا كنتي) الطرفان يسحبان نفس الحبل وهو المكرود الزوج فهو لا يعرف بجانب من يكون ايكون بجانب أمه التي ولدته وسهرت وتعبت عليه أم يقف بجانب زوجته التي تركت أهلها وعزها ودلالها لتكون لشخص واحد والمكرود يبقى حاير يرضي أمه لو مرته انتوا شتكولون وتبقى علاقة العمة والكنة علاقة مد وجزر مراح اطول عليكم هسة نسولف سالفة يعني الأم لازم تفك ياخة من أبنها بعد الزواج. …مو كل شوية تقوله مشغول حضرتك ومجايب صمون …..ملتهي حضرتك وما وديتني لبيت خالتك اووووووف ولك لو مأخذ بنت خالتك مو أحسن وهاي كلها مسامير للكنة مو لابنها طبعا. ورة شوية المواعي المن ينتظرن والطرمة صايرة طين وتقوم الكنة تنفذ وتنظف حتى تسكت لسان العمة. …والعمة حتقف سكينة خاصرة للكنة ورة متهلك الكنة العمة تقول هو هذا تنظيف هاي هيجي تعلمتي في بيت اهلج لو هاي لان يمي تتعززين براسي عيني هذا الحجي ما يصرفلي. الكنة من حرقت قلبها حتعيط بالعمة وتقول هو مو صوجج صوج الي دينظف وصوج هذا الكاعد يسمع وساكت وكبت العيطة وراح يوكع بيها المكرود ينذب كل شيء برأسه حتطلع مرته زعلانه لبيت أهلها وأمه هم حتزعل لأن تقول خايف من مرته وما يرضيني وهكذا وعلى هالرنة طحينج ناعم ويبقى المثل (لا العمة ترضى على الكنة ولا الكنة ترضى على العمة) وبحكم الي شفته وصار بحياتي الموضوع كله يرجع للولد يعني الزوج عليه أن يكون دبلوماسي يمتص غضب أمه وامتعاض زوجته لكل شخص نقطة ضعف فعليه إيجاد نقطة ضعف كليهما ويريح باله ويحكم عقله قبل قلبه بلكن يرتاح وهمة هم يرتاحون

Please follow and like us:

الايجابية

14569640_1160815240664828_994270094_n

بقلم: ليلى طارق الناصري

مرحبا جميعا …تحية طيبة لكم

أود أن أحدثكم اليوم عن الإيجابية ما هي؟ كلنا قد مر علينا أحد المصطلحات التالية بشكل أو آخر ربما سمعنا بها من صديق أو على مذياع او قرأتها ذات يوم في مقال ما وأكثر المصطلحات شيوعا عن الايجابية هي:

التفكير الإيجابي / الطاقة الإيجابية / السلوك الإيجابي

فما هي الإيجابية إذن ؟! ..قمت بسؤال عينة عشوائية من حولي من مختلف الأعمار والثقافات وكلا الجنسين وكانت أغلب الردود محصورة بما يلي:

  • هي تنظير وكلام كتب لا أكثر.
  • هي أنك تظل متفائل مهما حدث , (ليش ما أدري!! ).
  • هي ضحك على الذقون يقوم به متحذلقين على الناس البسطاء.
  • هي نوع من الأوهام يعيشها الأشخاص حتى ينسون ألام الواقع.
  • قلة جدا أجابت بأنها لا تعلم ولا تعرف ما هي الايجابية.
  • النسبة الأقل هي من أجابت بان الايجابية هي الأيمان بالله وقدره والرضا.

والحقيقة أن الايجابية غير كل ما ذكر أعلاه !

فما هي إذن؟

وقبل ما أجيب أحب ألفت أنتباه القارىء العراقي أو المتلقي أني لست أحيا ظروف معاشية مرفهة ولهذا أسولف براحتي خوش سوالف أو أتحدث من برجي العاجي ولا أفقه من الواقع المرير شيء ( لو عايشة يوم مثلنا ماجان حجيتي هيج / هو يلي يعيش بالعراق يقدر يفكر بايجابية!) وألخ من التعليقات المتنوعة وكلها تصب بمعنى شوفوا البطرانة شتحجي!!

أنا أعيش بسوريا منذ سنوات ولست في مناطق الساحلية الآمنة نسبيا كلا انا أعيش في ريف دمشق ويوميا نصحو على صوت الانفجارات والقصف المدفعي الذي يستهدف مناطق حولنا واطفالي تعودوا عندما يهتز البيت وشبابيكه ان يتجهوا الى ابعد غرفة عن الواجهة حتى يحموا انفسهم ومرت علينا قبل 3 سنوات ايام لا يعلم بها سوى من عاشها معنا ولست هنا بصدد المزايد على جروح أحد ما او على ما تحمله وقاساه من ظروف وضنك عيش وخوف ورعب وقلق لأننا سواء كنا بالعراق او سوريا نعاني نفس الأمور ونفس معاناة أضف الى الغلاء المعيشي وقلة فرص العمل ولا يوجد كهرباء وماء بكل الاوقات وعندما يخرج أحدنا الى عمله أو مدرسته لا يعلم ان كان سيعود الى عائلته ويراها من جديد لأننا لانعلم متى يحدث تفجير ما تماما كالعراق وقد اضطررت لشرح والتوضيح حتى نوفر على أنفسنا تعليقات معينة ومن ثم اضطر اجاوب واحد واحد  وهذا كله لا يعني بتاتا أن من يعيش خارج العراق وسوريا في اوربا أو كندا او امريكا او اي بقعة آمنة في الأرض يعني انه سعيد ومرتاح ويا سلام ليس لديه همومه ومعاناته أنا واثقة أن كل منا مبتلى على قدر من تحمله بين حين وآخر وكل انسان لديه من الصعوبات التي يضطر للتعامل معها اما بسلبية أو أيجابية

وها قد وصلنا أحبتي الى الا يجابية ترى ماهي ؟ هي ببساطة المرونة النفسية هي قدرتنا على ايجاد الحلول لما نواجه من مصائب وتحديات في حياتنا.

الايجابية هي التفاؤل …(تفاءلوا بالخير تجدوه )

وهذا لا يعني ان الشخص المتفائل أو الايجابي لن يمر بمعاناة ولن يمتحنه الله بفراق عزيز او خسارة حب او فقدان مال اوأي نوع من خسارات  كلا بالطبع فنحن بشر ونحيا على نفس الارض وتحت نفس السماء لكن الفرق بين الايجابي والسلبي هو طريقة تعامله ونظرته للتحديات ومثال بسيط لأوضح فكرتي :

طالب مجتهد ومجد وفي سنته الأخير بالجامعة والدرجة النهائية حاسمة بالنسبة له للتنافس على مقعد مجاني من اجل استكمال دراسته العليا وكل الظروف متوفرة وقد اخذ بكل الاسباب من دراسة وتنظيم وفجاة يتعرض الى حادث سيارة ولا يتمكن من دخول الامتحان وتضيع السنة عليه ويضيع المقعد الدراسي المجاني وأضف لذلك فقد أحد قدميه وأصبح معاقا

الانسان الايجابي : يبدأ بتقبل ما حدث ويتعافى أسرع ليعمل على دخول الامتحانات من جديد ويسأل ان كان ممكن التنافس على فرصة جديدة من اجل اكمال الدراسة وبنفس الوقت ييبحث عن أطراف صناعية وكم كلفتها وهل يستطيع توفيرها الآن ام سيتطلب بعض الجهد ويستمر بالحياة بشكل طبيعي مبتسما متقبلا للظروف التي قد تعاكسه لكنه مستعد لأيجاد الحلول لها.

الانسان  السلبي: يرفضه ولا يتقبل الذي حدث يبدأ بلوم كل ما حوله بداء من الحظ والظروف وحسد الآخرين ويلوم الله ويعاتبه ويتذمر على طول الخط يشع بالسخط والكآبة على كل من حوله ويرثي لنفسه ويتباكى عليها وقد ينعزل ويكره اي حلول مقترحة وربما يترك الجامعة ككل او يدخل الامتحانات التالية على مضض ويتخرج بمعدلات منخفضة تؤثر على كل مستقبله وخياراته المستقبلية من اختيار الوظيفة او المهنة الى اختيار الزوجة وتسحب الخيبات الواحدة تلو الآخرى دونما يفكر للحظة انه كان يستطيع ان يغير هذه الخيبات بيديه بمجرد أن يتخلى عن التفكير السلبي والسلوك السلبي.

التفكير السلبي يؤدي الى سلوك سلبي الى نتيجة سلبية الى طاقة سلبية تؤدي من جديد الى تفكير سلبي وهكذا ندور في حلقة مفرغة

positivity

بناء لما شرحته أعلاه يتوجب علينا أن نعمل على تغيير طريقة تفكيرنا وتعاملنا مع مفردات الحياة وهذا ما سأتناوله في مقالتي القادمة إن شاء الله وكيف لنا ان نحقق ذلك بخطوات.

 

ليلى طارق الناصري

مراجع :

  • د. أحمد عمارة _ القاهرة اليوم _ تحقيق الهدف والإصرار عليه_
  • د. إبراهيم الفقي كتاب غير حياتك.
Please follow and like us:

راقصة الباليه

بريشة عمار الوندي

بين ماضي بعيد تليد مجيد عابق بعطر الثراء والتفكير والدين

وماضي قريب يمر به حاملا معه سفراء بين كراسيه

ومستقبل يتراقص على الحان اوتار التاريخ

يمضي لايتوقف مثل دجلة نابض بالحياة. متابعة قراءة “راقصة الباليه”

Please follow and like us:

أنا بخير يا أمي ….

بقلم زينة الالوسي

أمي ….فطومتي….حبيبتي….بتاريخ 2016/8/22 (تاريخ الصدمة) رحلتي عن عالمنا ….رحلتي عن دنيتنا رحلتي ولم تعودي موجودة جسدا في حياتنا …. سافرتي بعيدا بعيدا وهالمرة سفرة طووووووووووووويله وبلا رجعة ذهبت الى أحلى الاماكن وبتذكرة سفر غير مرجع….ذهبت الى عالم من أحلى وأروع واجمل وأنقى وأصفى مايكون….تركتينا نحن أحبائك وأغلى ماعندك وجميع محبيك وذهبت بجوار ربك….ذهبت سريعا جدا جدا وعلى حين غفلة ولم يكن شيء بالحسبان او متوقع لم تكوني تشتكين من شيء لا مرض ولا الم سوى التهاب الفقرات نتيجة التعب المستمر وأدارة منزل يكاد يكون فندق خمس نجوم بالاضافة الى العمل كمدرسة لغة انكليزية تراعين طلبات الجميع صغيرهم وكبيرهم من مأكل ومشرب وملبس ورعاية اثناء المرض والذهاب الى الاطباء والمستشفيات والتسوق وأداء جميع أنواع الواجبات الاجتماعيه المفرحة والمحزنة وأقامة افخم واكبر والذ واكثر الولائم والعزائم فخامة واناقه وترتيب ورقي  ومؤخرا التهاب المفاصل نتيجة التقدم بالعمر …. عشت كل حياتك بنشاط وحيوية وصحة وعافيه وأبتسامة لاتفارق وجهك ترحبين وتحيين الصغير قبل الكبير مرددة عبارة (هلا هلا وكل الهلا  ومية هلا )وبيتك دائما مفتوح للجميع اقارب واصدقاء وجيران تدارين الكل وقايمه بالواجب للكل بأفراحهم واحزانهم ومرضهم وشفائهم …. فكل عطلة او أجازة او عيد يتحول بيتنا الى منتجع سياحي للاقارب وتقومين بضيافتهم بأروع واحلى مايكون على حساب راحتك وصحتك و وقتك الخاص وخصوصيتك …. يمرض احدهم فيأتي المريض ومرافقيه من خارج بغداد ويقيمون عندك وتذهبين مع مريضهم للمستشفى وتحضرين الطعام للي موجودين بالبيت وللي بالمستشفى وتستقبلين الزوار وتقيميلهم بالواجب…. اللي عنده مراجعة لدائرة او وزارة في بغداد ينزل في بيتك وتقيمين بواجب ضيافته …. تحصل فاتحه في العائلة تتحولين الى سايق للاقارب والمعارف تاخذيهم للفاتحه وترجعيهم لبيوتهم بعد انتهاء الفاتحه ومن ترجعين للبيت تشوفين عندج خطار توكفين وتسوين احلى واطيب والذ عشاء والابتسامة ماتفارق وجهك…. الكل يعرفج ويقدرج ويحترمج ويحبج ويحسبلج الف حساب و كلامج مسموع ورأيج مطلوب مو بس لأنه انت زوجة دكتور وجيه اللي هو رمز و رفعة راس وفخر و وجيه من وجهاء العائلة بس لأنه انت (أم سندس للقدماء وأم أحمد للجديدين) اللي تحب الكل وترضي الكل وتحترم الكل واللي يغلط ويتجاوز من صغار العقول ومرضاء النفوس توكفيه عند حدة وتعرفي خطأ وتعاتبيه وتوجهي بكل أدب واخلاق ولباقه وكياسة …. مكافحه مثابرة، تعبتي في شبابك وكافحتي فكنت محاسبة في النهار وتدرسين مسائي في جامعة بغداد كلية الحقوق …. كنت خير ابنة خاله وحبيبه وصديقة ورفيقة درب يتخلله الكثير من التضحيات والتعب والصبر والتنازلات والافراح والاحزان والاهتمام والحب لوالدي، تشاركتكم في كل شيء المره قبل الحلوة والصعبه قبل السهله …. تشاركتكم بكل خطوة أيد بأيد وگلب علی گلب  والفلس على الفلس بمشوار طويل وصعب ومتعب بس حققتوا اللي جنتوا تحلمون بي كونتوا عائلة وبنيتوا بيت صار هو بيت العائلة صار هو البيت اللي جدو عايش بي صار البيت اللي لمة اول يوم العيد واول يوم رمضان تكون بي صار البيت اللي كل الاهل والاقارب يزوروه بحب ومودة صار البيت اللي  ترك اثر وذكرى ما ممكن  تنسي في نفس كلمن زارة ودخله صار البيت اللي يضرب بي المثل بالنظافة والاناقة والشياكة والترتيب وحلو المعشر وحلو الترحاب وحسن الضيافة وكرم الاخلاق صار البيت اللي بي احلى الذكريات واجملها بغض النظر عن بعض الاحداث الغير سارة من الوفيات والمرض صار البيت اللي عاشوا بي اربع اجيال من الجد واخواته وبناته وابنائه واولادهم في نفس الوقت والكل متعايشين بحب واحترام وكلمن اله مكانته…. هيجي چنتی انت فراشة و حمامة سلام وتحومين حول الكل بس تعبتي يافطومتي كل هاي المداراة والركض والاهتمام والعزايم والخطار والناس اللي تبات وتصبح بالبيت والناس اللي تجي تصيف يمج واللي واللي واللي.. كل هاي تعبتج فطومتي وبين بيج التعب بالاخير بس برغم التعب عشتي مدلله معززة مكرمه وسعيدة ومرتاحة لانه سعادتج وراحتج چانت بسعادتنا وراحتنا حته لو على حساب صحتج وراحتج…. تعبناج فطومتي كلش تعبناج ويانا ومن جنه نكولج “تعبناج فطوم” “أجاوبينا.. تعبكم راحتي وسعادتي والله يوم لو اگدر اسوي اكثر  چان سویت”. هيجي چانت فطومتي واني چنت انتظر بالخارج بعد  مايكمل الاجراء يجي احد من طاقم التمريض ويبلغني حته اروح واغير ملابس امي ونطلع ننتظر بغرفة الى ان بابا يكمل شغل ونرجع للبيت ونكمل حياتنا وفطومتي تصير زينه وتتشافى وتتعافى، بس… ماطلعت ولا اجه احد وگلي تعالي ماما خلصت وماما زينة والامور تمام محد بلغني اي شي ومرت عليه اتعس واطول ساعة في حياتي حيرة تامه وقلق وبدون ذكر التفاصيل طلعت ماما بعد ساعتين طلعت ماما بس ماما مدا تمشي ماما جانت نايمة على سدية وموصولة بأجهزة كهربائية وماما مدا تحجي او تضحك او تستقبلني (بهلا بحبية ماما) مثل كل مرة…. ماما جانت مغمضة واخذوها لغرفة العناية المركزة … واللي افتهمناه وهي بغرفة العناية المركزة انه اللي صار اثناء تنظيف المعدة لتهيئتها لرفع البالون وكل مؤشراتها الحيوية طبيعيه جدا وعلى غفله وبعد 10 دقايق توقف قلبها واستمروا بأنعاشها لمدة 70 دقيقة وماكو اي استجابه مو 10 دقايق او 20 او 40  دقيقة 70 دقيقة يعني ساعة و10 دقايق وبدون توقف وماكو اي استجابه صارت نبضة وحدة نبضة وحدة بس على اثرها ربطوها بأجهزة الانعاش ونقلوها لغرفة العناية المركزة املا منهم يانقاذ حياتها بس  مشيئة رب العالمين… خلال النص ساعة اللي كانت فيها فطومتي بالانعاش اني جنت رافضه الفكرة تماما ومستسخفة الموضوع ومامستوعبه اساسا وجنت اردد وبدون حته تفكير “اللهم لانسألك رد القضاء ولكن نسألك اللطف فيه وياربي والله بعدني أحتاج امي في حياتي ياربي لاتعاقبني على اي شي سويته بحياتي وتاخذها مني  اللهم لانسألك رد القضاء ولكن نسألك اللطف فيه” يمكن كررتها الف او الفين مرة ويجوز اكثر خلال النص ساعة بس أرادة رب العالمين جانت اقوى …. وطلع بابا من غرفة العناية المركزة وبلغنه بالخبر المشؤوم …. أحساس الخوف والرعب والوحدة اللي حسيت بي بوكتها ماممكن اكو كلمات توصفه او تعبر عنه أحساس وشعور مكروه بشكل مرعب أحساس مخيف بكل ماتحمله الكلمة من معاني حسيت نفسي طفله عمرها 4 سنوات وكلشي ماتعرف وكل اللي تريده امها تريد تشوف امها وتحضن امها وتسمع امها تگولها “اني زينة ومابيه شي حبيبتي وراح نرجع للبيت” بس كلشي ماسمعت ولا امي حجت ويايه ولا كعدت ولا رجعت ويانه للبيت …. احنه اللي رحنه نودعها ونسلم عليها ونشوفها لآخر مرة ونرجع للبيت بدونها …. دخلنه عليها للغرفة شكلها نايمه ومرتاحة ومبتسمة فطومتي جان شكلها نايمه وفرحانه ومرتاحة و وجهها حلو وناعم وجسمها دافي وطري امي جانت نايمه حضنتها واني اتمنى اذا راح احضنها حيل راح تكعد من النوم.. بس ماكعدت وبقت نايمه ودموعي !!!! معقولة هالكد عدنه دموع جنت اوصل مرحله نفس ماكو واختنگ بس الدموع مستمرة وبكثره وبدون توقف…. بقينا يمها ساعات وبلغنة اخوية اللي عايش بالخارج وصارله ست سنوات ماشايفها بس عن طريق السكايب لظروف عمله وكانت ردة فعله “شنو امي تموت  اني صارلي ست سنوات ماشايفها” وطلب منه أنه نأجل الدفن الى ان يوصل وفعلا حجز فورا وكام وصولة يوم الثلاثاء بعد المغرب فعفناها لفطومتي بالثلاجة وحدها ورجعنه للبيت …. رجعنه للبيت واحنه بين مصدومين بين مامصدكين بين منهارين بين مستغربين واني أعيد واكرر اللي صار وبحذافيره مع كل اللي اتصلوا او حضروا للبيت او ما عرفوا بالخبر التعيس وطبيعي مانمنه بيومها ولا باليوم اللي بعدة و وصل اخوية بالفعل وجان اللقاء من أصعب وأقسى مايكون وبقينه كاعدين وحالتنه حاله يوم الاربعاء رحنه للمستشفى ودخلنه للمكان اللي بي الثلاجة اللي بداخلها فطومتي وجانت نفس الشكل ولامتغيرة ولاعبالك متوفيه شكلها نايمه ومرتاحة ومبتسمة سلمنه عليها وتركناها ويه اخوية وحدهم فتره ودعها وحجه وياها على راحته بعدها من وصلت سيارة الاسعاف اللي اخذتها للتغسيل والمسجد دخلنه جميعنا لتوديعها الوداع ماقبل الاخير ومن اجه دوري قبلتها عدة مرات وقربت عليها وگتلها “أمي انت فطومتي انتي حبيبتي والله أحبج يا امي” وصار اللي ماممكن انسى عمري كله ولايروح من بالي وكلما اتذكره تنزل دموعي بجنون …. نزلت دمعة من عينها اليسار ومتأكدة مليون بالمية انه كانت دمعة …. ورحنه ويه امي ولآخر مرة اني واخوية الصغير وياها بسيارة الاسعاف اني بأيدي القرآن وداقرالها السور الموصى بها واخوية ديسولف وياها ويطمنها علينه….وصلنه لمكان التغسيل ودخلنه اني واختي وحضرنه كل الموضوع من بدايته الى نهايته وبعد ما كملنه كلشي دخلوا والدي واخوتي و ودعناها جميعا الوداع الاخير هم ذهبوا الى المقبرة ورجعنا اني واختي ومعنا اقاربنا اللي كانوا حاضرين ويانا للبيت وبدأنا بالتحضير للفاتحه وعزاء النساء وانقضت ايام الفاتحه الثلاثه وحضروا الاقارب والاصدقاء والمعارف من كل مكان وبعد انقضاء الايام الثلاثه الاولى انشغلنا بوجود اخي وعمي وابن عمتي معنا في المنزل حيث جائوا مخصوص للحدث التعيس بعدها استمروا الاقارب والاصدقاء بالحضور والاتصال المستمر لمواساتنا والوقوف بجانبنا لانها كانت فتجعه وصدمة بكل المقاييس المهم انقضت ايم الفاتحه واللي حضروا من غير بلدان رجعوا لحياتهم واعمالهم وصفينه وحدنا بالبيت بابا واختي وانا واخي الثاني يأتي بعد انتهاء دوامه …. البيت ممل وكئيب وهاديئ ومظلم وشعور بالفراغ والنقص كبير جدا جدا ولخاطر بابا مسيطرة على مشاعري ونهائي ما ابچي گدامه بالعكس اضحك واتشاقه ومهتمه بالبيت وكلشي على (سنگة عشرة) ولا كأنه شي تغير بس بداخلي الم وصرخه مكبوته وحزن عميق ومخيف ما جنت متخيله او متصورة انه راح اشعر او احس بي ورغبه بالبكاء 24 ساعة وكل ما اكون وحدي تنزل دموعي من غير شعور وتاخذني الصفنات بدون ما احس مجرد صفنات مجردة من اي شعور او احساس او اي شيء كأنه اروح بدوامة من الفراغ انعزل عن العالم الحواليه تماما وانسى كل شيء من حولي تماما وارجع بعدها تايهه…. قضيت فترة تقريبا اسبوعين بهاي الحالة (حالة الصفنات الغريبة المخيفة المرعبه) و الحمدلله  اختفت وماتكررت بعدها ولكن دموعي ولحد اليوم كلما اكون وحدي تنزل بدون شعور….كلما احط راسي على المخدة تنزل….كلما ازور قبر فطومتي تنزل …. كلما اطبخ اكله تحبها واوزع على روحها تنزل دموعي
بس بعد مرور ثلاثة اسابيع وبعد ان رجعت احچي مع بعض الاصدقاء والناس المقربة اللي بحياتي بديت استوعب الموضوع  واتعامل معاه بهدوء اكثر والحمدلله اني أنسانه مؤمنة بقضاء وقدر رب العالمين ومن اليوم الاول جنت اردد وبدون انقطاع “اللهم لا اعتراض على حكم رب العالمين” بس صارت عندي حالة من الغضب والرفض وماكنت حابه هذه الحاله ومريت بحالة ندم، ندم على مواقف او كلمات  گلتها بساعة غضب او عصبية وحالة لوم للنفس وحالة كآبة شديدة من عدم رغبه بالاختلاط بأي احد والرغبه في النوم لايام وعدم الاستيقاظ وعدم رغبه بالاستحمام او تغيير ملابسي  وغيرها من الحالات اللي هي عكسي وعكس شخصيتي تماما حته وصلت مرحلة كرهه للنفس وكره لشكلي وصوتي وكل شيء والصراحة هذه الحالات خوفتني لانه ماره بحياتي بالكثير من المواقف المؤلمة والموجعة واللي من ضمنها حالات وفيات وفقدان ناس غاليه وعزيزة عليه وكنت انهار واتألم وابچي بس اطلع منها اقوى وأحب الحياة اكثر واتحدى واصر انه اعيش حياتي مثل ما اني اريد واتفائل واخلي ايماني وثقتي بنفسي ورب العالمين اقوى واقوى في كل مرة  بس هالمرة چنت يوم عن يوم دا اضعف والحزن والكأبة والكسل والخمول وعدم الرغبه بالحياة بأبسط صورها دتسيطر عليه وتتحكم بحياتي ومزاجي وچنت مرعوبة چنت خايفة واكثر اللي چان مخوفني أنه اللي چانت تدعيلي من كل قلبها راحت وانحرمت من دعواتها اللي چنت افضفضلها مرات راحت اللي چانت تريحني بمجرد انه تسمعني راحت چنت خايفة من كل هاي الامور بس بلحظة كعدت ويه نفسي وقررت انه لازم اتحدى هاي الحاله وماخليها تسيطر عليه وتقهرني اتخيلت لو فطومتي موجودة جانت انقهرت واتأذت  لو تشوفني بهاي الحاله….قررت ارجع ارجع للأنسانه اللي ماتفارق الضحكة وجها ارجع للأنسانه اللي گلها امل وتفاؤل وحب للحياة والضحك أرجع للأنسانه اللي تحبها فطومتي واللي جانت تضحك على سوالفها ونصباتها وشقاها وسوالفها أرجع للأنسانه اللي كل اللي مرت بي من قبل ماكسرها ولاضعفها بالعكس خلاها اقوى وأشد وأحسن….صح اني موجوعة ومجروحة ومتأذية بس لخاطر امي لخاطر فطومتي اللي چانت تحب الحياة راح أرجع لخاطر بابا اللي عمره كله كضاه لخاطرنا وعلمودنا ولساعدتنا راح أرجع لخاطر الناس اللي أسعدهم واضحكهم ويحبوني وأحبهم واللي متأكدة حالتي هاي مأذيتهم ومأثرة بيهم ومفتقدين وجودي في حياتهم راح أرجع لخاطر نفسي راح أرجع ولازم أرجع….مهما أشتدت الازمات وضاگت وقست الدنيا علينا لابد يجي يوم وتفرج وتهون….والحزن والوجع مهما چان چبير يچيله يوم ويصغر وكل اللي راح يبقى الدروس والعبر والذكريات.
فطومتي حبيبتي أمي أطمني اني زينة بنتج الصغيرة قوية وصابرة وراضيه بقضاء وحكم رب العالمين صح مشتاقه وصح اتمنى وجودج وصح مشتاقه لصوتج وضحكتج وبعدني محتاجتج يا أمي بس اني زينة وفرحانه لأنه انت ماتمرضتي ولا تأذيتي ولا تعذبتي ولا انذليتي ولا انهانيتي وصارت مثل ماجنت دائما تندعين وتطلبين (هينه لينه) حته من طلعت روحج وسلمتيها لوجهه رب كريم چنتي شبهه مخدرة ودتضحكين رحتي من غير الم او وجع رحتي معززة مكرمه وبهدوء وصارتلج تغسيله مثل تغسيلة العروس عبالك زفة والفاتحه كأنه جانت لمة فرح كل حبايبج موجودين وصارت مثل ما انت تريدين وتحبين  وهذا اللي مصبرني يا أمي ودعتج وحضنتج وبستج وگتلج كل اللي اريد اگولة  وشفتهم من ديغسولچ و ودعتج اخر وداع ودائما راح ازورج وادعيلج دائما وابدا واتصدق على روحج….اطمني يا أمي اني زينة ولايظل بالج أرتاحي فطومتي وعوضي تعب السنين وأتونسي ويه حبايبج اللي أشتاقيتلهم…  جسدا انت رحلتي عنا بس تبقى روحج وسوالفج مزروعة بينا و ويانا طول ما احنه عايشين…. مشتاقتلج فطومتي….أحبج يا أمي….أطمني يا أمي ….أني بخير.
أنا بخير يا أمي ….
أنا بخير يا أمي ….
Please follow and like us:

كن حسينيا

بقلم ليث حمودي

هلَّ علينا شهر محرم الحرام, هذا الشهر الذي أنقلب رأسا على عقب في سنة 61 للهجرة. فبعد أن كان هذا الشهر الحرام رمزا للسلام لأنه من الأشهر التي يحرم فيها القتال, جاءت سنة 61 هجرية لتشهد في مطلعه أحدى أبشع الجرائم الأنسانية حينما أقدمت زمرة فاسقة مارقة عن كل شرائع الله والأنسانية على أنتهاك كل المحرمات حينما قتلت في العاشر منه ريحانة رسول الله وفلذة كبده سيد شباب أهل الجنة الأمام السبط الحسين بن علي بن أبي طالب عليه وعلى أهل بيته الصلاة والسلام مع ثلة من أهل بيته وأخوته وصحابته الصالحين رضوان الله عليهم أجمعين. إقرأ المزيد

Please follow and like us:

كيف أتصالح مع نفسي؟

بقلم ليلى طارق الناصري

ربما يبدو العنوان غريبا أو قد يسأل البعض لم أساسا أحتاج للتصالح مع نفسي!؟ وهل نحن متخاصمان؟!!ي

هناك بعض العلامات التي إذا وجدتها فيك فهذا يعني انك بحاجة لأن تتصالح مع نفسك لأنك ونفسك على خلاف ومن أهم هذه العلامات هي:ي

  • حديث النفس السلبي : وهو ما نتحدث فيه مع أنفسنا من حديث داخلي صامت أو مسموع لكنه يتميز بكونه سلبي؛ مثال : ولا مرة قدمت على عمل وضبط معي لم هذه المرة ستكون مختلفة!!

أو كل ما أقول فرت يجي شي يخرب الشغل أني فكر ما عندي حظ هيه كوة!

  • الغضب الدائم : سرعة الإثارة لأتفه الأسباب أو دونما مبرر واضحة.
  • عدم القدرة على تقبل النقد : لا أتقبل النقد الموجه لي من الآخرين حتى و إن كان بناء بينما في نفس الوقت أنا أجلد نفسي بنقد سلبي وقاسي.
  • عدم القدرة على الاستكمال أي خطة لتحسين الذات داخليا أو خارجيا:  قد أكون ناجحا في وضع خطط للغير ومساعدتهم على تحقيقها واكون جيد جدا في ايجاد حلول للآخرين ومشاكلهم لكن عندما يتعلق الموضوع بما يخصني لا انجح وافشل حتى وان وضعت خطة محكمة لمساعدة ذاتي,( كعمل ريجيم لانقاص وزن او زيادته بسبب النحافة أو اكتساب مهارة جديدة تطور الذات).
  • التشائم يغلف أغلب أحاسيسي الداخلية : حتى لو لم أكن شخص سوداوي وبطبيعتي مرح واحب المزاح وأجتماعي بشكل جيد (لكن في ما يتعلق بنظرتي لذاتي انا متشائم )

بعد أن استعرضنا أهم العلامات التي تشير الى عدم تصالحنا مع الذات والتي تسمح لنا بتقييم وضعنا لانه يصدف ان نكون غير واعين لهذه النقطة وحاجتنا لأيجاد الحل لها.

كيف أحقق التصالح مع ذاتي بخطوات:

  • التأمل:
  • أجلس مع نفسك يوميا ما لا يقل عن 20 دقيقة في مكان هادئ دونما ضجيج أو مقاطعه واختر أي تمرين بسيط من تمارين التأمل المتوفرة بكثرة على النت
  • أكتشف نفسك من خلال هذا الوقت الذي تختلي به معها بما تفكرعن ذاتك ؟ ما نوع الحديث هل هو سلبي أم ايجابي الذي تتحدث فيه عن نفسك لنفسك؟
  • واجه نفسك بأخطائها وأعترف بتلك الأخطاء سواء كانت بحق شخصك قد ارتكبتها أو الآخرين.

 

  • تقبل الذات:
  • بعد أن واجهت نفسك واعترفت بأخطائها قم بالعمل على أصلاح تلك الأخطاء بالنسبة للآخرين حاول الاعتذار بكل الطرق إما بشكل مباشر وطلب السماح منهم أو عن طريق عمل شيء ايجابي لهم لتنفعهم وأي طريقة أخرى كالدعاء لهم أن كان صعب أن تلتقي بهم أو توفوا أو التصدق بأسمائهم.
  • أبدء بتقبل ذاتك بعيوبها سواء كانت شكلا أو قلبا كقصر القامة أو السمنة توفرت أو كالتأتأة بالحديث أو ضعف في ردود الفعل الصحيحة الغضب و إلخ وأعمل بذات الوقت على إيجاد حلول لها.
  • اكتشاف نقاط القوة:

أ-أبحث مع نفسك عن نقاط القوة فيك ما المهارات التي تتميز بها الملكات الخاصة التي رزقك الله بها وان لم تستطع أن تكتشفها لوحدك أستعين بذوي الخبرة كالأخصائيين أو أصدقاء يملكون الخبرة.

  • أبدأ بتطوير هذه النقاط وتوظيفها واستثمارها بشكل ايجابي في حياتك اليومية والعملية.
  • الخطوة الأخيرة أحب ذاتك وامنحها التقدير الكافي وبذات الوقت أستمع لما يقدمه الآخرين من آراء حولك سواء ايجابية أو سلبية لكن بحذر وتوازن (حتى لا نصاب بالغرور أو الإحباط) إنما آراء الآخرين قد تساعدنا على تقييم ذاتنا بشكل متجدد بين فترة وأخرى وحتى أن كانت سلبية هذا لا يعني أنني لا أحب نفسي كلا أنما أتعامل مع ذاتي برفق وحب وأكون داعمة لنفسي كي تتحسن نحو الأفضل دوما.

أكتبوا رسالة  أمتنان و تقدير لأنفسكم  احتفظوا بها بمكان تتذكرونه وأرجعوا لها بعد فترة لقرأتها ستجدون أنكم بحاجة لقراءتها كلما شعرتم بانخفاض لتقديركم الذاتي وربما تضيفون أمور ايجابية أخرى اكتسبتها شخصيتكم خلال هذه الفترة المهم دوما كونوا أصدقاء محبين لأنفسكم

المصادر:

  • كتاب احتراف السيطرة على النفس وأنبعاث الطاقات.
  • دكتور أبراهيم الفقي
  • أسرار القوة الذاتية /دكتور أبراهيم الفقي
Please follow and like us:

آني عليّه مو شعليّه

بقلم ليث حمودي

قبل أثنا عشر عاما ونيف, كنت أسير في منطقة الباب الشرقي. حينها كانت الفوضى سيدة الموقف وكان غياب الحكومة والنظام يلقي بظلاله على مرافق الحياة عامة دونما رادع قانوني او أخلاقي أو ديني. أذكر فيما اذكر أنني شاهدت صاحب باص وهو يوقفها في منتصف الشارع لينادي على وجهة سيره. حينها توقفت قليلا أمامه ونظرت بصمت. انتبه الى وقوفي فبادرني بلهجة دارجه

هو:- ها خوية خير محتاج شي؟

أنا:- اي والله عندي سؤال ومستحي اسأله

هو:- على بختك گول واسأل ولا يهمك

أنا:- بس أتمنى ما تضوج

هو :- لا عادي ليش

– أنا:- أنت مسلم مو تمام؟

هو:- اي نعم مسلم

أنا :- تره كل علماء المسلمين يگولون الرزق اللي يسبب مضرة للناس حرام وانت وگفت سيارتك بنص الطريق وسببت ازدحام وضايقت الناس ورزقك هيچ صار حرام

هو:- ليش هو بس آني؟ أشو كلها بكيفها

لن اكمل باقي المحادثة لأنني توجهت له بسؤال أرعبه وأستفز كل قيمه الأعرابية البدوية الجاهلية وختم نقاشه معي بعبارة (يمعوّد وآني شعلية). إن عبارة (آني شعليّه) هي اولى ركائز خراب اي بلد لأنها انعكاس واضح لأنانية الفرد وتفضيله المصلحة الشخصية على المصلحة العامة وبالتالي فمما لا ريب فيه أن هذه العبارة هي أرث جاهلي متجذر لا يمكن اقتلاعه بسهولة من أرض الشخصية العربية التي تمتد جذورها الى الاف من سنين القتل والسطو والنهب والأستئثار بكل ما هو متاح. ولا جرم أن الجهل وغياب التفكير اضافة الى غياب التوجيه بصورة متعمدة او غير متعمدة هما أيضا سببان أساسيان في أستفحال ظاهرة ال (آني شعليّة) وهنا لا بد من الأشارة الى غياب تأثير أحد أبرز مقومات المجتمع الشرقي في محاربة المعتقد الجاهلي (آني شعليّه) ألا وهو الدين. كما يعلم الجميع أن الدين هو أساس بناء المجتمع الشرقي وهو العامل الأكثر تحكما في حياة الأنسان الشرقي. ومن الواضح لكل ذي لب أن الغالبية العظمى ممن تصدّى للمهمة الدينية وأعني المرجعيات الأسلامية بأختلاف مشاربها لا تضع معالجة هذه العقيدة الجاهلية في سلم اولوياتها بل أنها تتجاهلها بصورة مرعبة وتصب جل أهتمامها وتركيزها على السطحيات بل أن بعضها يصب كل تركيزه على زرع الفرقة وأختلاق المشاكل بين طوائف المسلمين. ان بناء العراق هو مسؤولية أهله بالدرجة الأولى وليس الحكومة ومن أجل المشاركة في بناءه بصورة فعلية يجب ان يرفع الجميع شعار (آني عليّه) وليس شعار (آني شعليّة). ففي نهاية الأمر, المواطن هو من يقوم بالجزء الأكبر فعلى سبيل المثال لا الحصر, يشتكي الكثير من العراقيين من ظاهرة أنتشار النفايات في شوارع المدن ولكن هل حاول الشخص المتذمر من هذا الأمر أن يسأل نفسه من الذي يرمي النفايات في الشارع؟ هل هو عامل النظافة أم المسؤول عن ملف الخدمات في تلك المدينة عندما يشعر كل عراقي بقيمة دوره في هذا البلد ويشعر انه مسؤول عن بناءه وأمنه وتطوره وحينما يدرك أن كل ما فيه يعنيه ويهمه وحينما يرفض أستخدام عبارة (آني شعليّه), حينها فقط يمكننا ان نتحدث عن بدء مرحلة بناء العراق

 

SSOHP : الصورة

Please follow and like us: