جورج فلويد امام مبنى جبل احد

حبيت اشارككم بفكرة … من يومين انتشرت صورة (مفبركة طبعا) للامريكي جورج فلويد امام مبنى المطعم التركي او جبل احد والذي يعتبر احدى رموز لانتفاضة  تشرين … الغرض منها طبعا التشبيه او محاولة التشبيه بين مايحصل من عنف ضد المتظاهرين في الولايات المتحدة وماحصل في العراق من سقوط شهداء وجرحى وخروقات وجرائم. ممكن ان يفسر البعض ان مايحصل في امريكا هو بسبب العنصرية والتفرقة الطبقية وهذا سبب لغضب الناس وخروجهم الى الشوارع وهي امتداد لتظاهرات مارتن لوثر كنج في المطالبة بالحقوق كاي مواطن – الرأي المضاد طبعا موجود وقابل للنقاش لكن في محل اخر. هذه من وجهة نظر عامة.

اما بشكل اكثر دقة، جورج فلويد فقد حياته على يد رجل شرطة على اساس انه يمثل القانون، وهي جريمة صارخة لايختلف عليها اثنين. هذا وجه الشبه… ممكن…  ولكن جورج فلويد لم يفقد حياته وهو يتظاهر في الشارع وينادي بحقوق المواطن.  لذلك اوجه التشابه غير واردة نهائيا ولذلك وضع صورته بهذا الشكل لاتمت باي صلة، وانما اجدها سطحية ولا اي رمزية فيها لمفهوم المطالبة بحقوق المواطن في بلدنا.

رسالة من منتسب بالفرقة الخاصة

السلام عليكم 
شباب اخوكم منتسب بالفرقة الخاصة 
حبيت اوضحلكم جم نقطه 
01. ماكو اي اشخاص اجانب بيناتنه كله اشاعات
02 . بينكم وبينه خط صد اتمنه تفهمون هذا الشي واكيد العسكري يعرف شنو خط الصد 
03 . احنه كلنه مثلكم نريد تغير الحكومه ونخلص من الاحزاب 
04 . احنه عسكر وعدنه اوامر نفذه 
05 . الي نرجو منكم عدم الاقتراب من جسر الجمهوريه او جسر السنك وحافة النهر بهذا الشي راح تعرضون نفسكم للخطر 
06 . بالنسبة للدخانيات .. الحوادث الي دصير بسبب انه الدخانيه مابيه تهديف فيعتبر حادث عرضي 
07 . الفرقه لاتخلو من بعض العناصر المسيئة 
08 . اكو هوايه جرحه بيناتنه بسبب تعرضنه للرمانات اليدويه وبطاله الملتوف من بعض المندسين بينكم وهذا الشي يخلينه بحاله تنرفز من اي شخص يحاول يتقرب من عدنه 
09 . اخواني اهل التكاتك ماله داعي تجي تفتر بتكتك كبال الصبات ويم الحاجز تعرض نفسك للخطر بدون فائده 
10 . احنه جنود قاتلنه هوايه ودافعنه عن العراق من الانبار  لتكريت للموصل وهوايه ضحينه 
11. منتسبين الفرقه الخاصه كلهم ذو تدريب ولياقه عاليه فمحاولت كسر الحواجز والتقدم ع الجسور اكبر خطا وخطوره عليكم 
12. الي اتمناه منكم انه تكون فعالياتكم سلميه وتتمركز بساحه التحرير للتنطون عذر انه نتصادم وياكم تره موسهله علينه كلكم اخوتنه ونحبكم 
13 . ابو المنجنيق الي بالمطعم بطل تشمر طابوك لان تعتبر تعرض للقوات وبهذا راح يكون اكو رد وممكن تتاذه ناس خلوه سلميه 
14 . لحد يحاول يندفع لان اكو اشخاص تحرض وانتو شفتو بعينكم من يوم 25 ولحد الان محد كدر يعبر مجرد ناس برئه اتئذت 
15 . الرحمه للشهداء واتمنى عراق خالي من الاحزاب والطائفيه والمحاصصة 
اخوكم .ن.ع.
هسه راح انام لان منايم من البارحه من اكعد ارد ع تعليقاتكم