دعوة للمشاركة في جولتنا الاثرية

يوم الجمعة 14/6/2019 الساعة الرابعة عصرا ستكون جولتنا الاثرية الى المقبرة الملكية في منطقة الاعظمية ومتحف مايس بيت رشيد عالي الكيلاني الي كلنا شفنا بمسلسل العرضحالجي في منطقة الشماسية ونختم جولتنا بالمسناية على نهر دجلة لمعرفة الرابط التاريخي بين منطقتي الاعظمية والكاظمية من الانساب والالقاب وتاريخ الجسر الخشب القديم وسيرافقنا بهذه الجولة المؤرخين الاساتذة نبيل الحسيناوي وياسر العبيدي

سيكون التجمع في ساحة الدلال بالاعظمية الساعة الرابعة عصرا والانطلاق بعدها بربع ساعة ونحن غير مسؤولين عن تاخير اي شخص يحضر ويانة

السعر للشخص الواحد 10 الف وسيكون ريع هذه الجولة للاعمال الانسانية ولخدمة الايتام والمسنين والاسر المتعففة

يرجع الحجز قبل الحضور للجولة على 07719791741 او 07711333446

 

اسماء الشالجي

ادارة فريق انقياء التطوعي للحفاظ على الاثار والتراث

زوروا المتحف العراقي

قبل من جنا اصغار كانوا اهلنا يودونة للمتحف العراقي على رغم من فقرهم للثقافة والمعرفة لان ابوية جان ميكانيكي (فيترجي والام خريجة متوسطة ) بس كان لازم انمر على المتحف العراقي قبل مانروح لمنتزه الزوراء واذا رحنا سفرات فلازم اتكون للمناطق الاثرية انزور المراقد الدينية وبعد ها انروح على الاثار فهذا الشي زرع بروحنا حب الوطن حب الحضارة حب الدين من خلال المراقد الدينية الموجودة عدنا .

حاليا العوائل اكثرهم خريجين ومثقفين فياريت اتبادرون بيوم من الايام بزيارة المتحف العراقي واتعرفون اولادكم على اثار بلدهم الي العالم كلها تتمنى توصل الها ، فد يوم من اتروحون للمول قبلها مرو على المتحف العراقي وقوموا بزيارتة وزرعوا باولادكم المحبة لحضارتهم وللانتماء لهذا الوطن والمتحف مفتوح يوم السبت من الساعة ٩ صباحا الى ٢ ظهرا …يوجد في المتحف 19 قاعة وكل قاعة تحجي عن عصر..من بداية التكويم ولحد زمن العثمانيين ….

اذن زوروا المتحف العراقي

************************

اسماء الشالجي

فريق انقياء التطوعي للحفاظ على الاثار والتراث