ابي يا زين الرجال

بقلم وشعر لؤي الأسدي.

لو اجمع كل كلمات الكون لكي اصف الجبل الشامخ الاشم والدي المرحوم كاظم  الاسدي فلن اعطيه حقه ..

الله يرحمك ياعزنا وفخرنا ودلالنا

في ذكرى وفاته السنويه ردت اكتب واگول

بليلة طيحتك انولد سبط الرسول

يا خادم حسين الزهرة تبرالك

چنت خيمة رفاهه تظل علينه افياي

غفت حتى اليتامة بحضن جنحانك

لا ترد سايل  ولا تنهر فقير

سخي وبكل وكت مفتوحة بيبانك

بالكرم غيمه  وتمطر بكل وكت خير

لا بردت گهوتك ولا طفت نارك

يا ماي الزلال اليروي كل عطشان

ياهو الماغرف من فيض نهرانك

اسد ضرغام امن الزلم مهيوب

ولا واحد تجرًه وچهب  ميدانك

شما تطلع زلم  والوكت بيهه يجود

تظل انته الشهم  والسبع عنوانك

عگالك بخت عگلك  يوزن البلدان

اعله الحگ ابد ما مال  ميزانك

صح انته رحلت بس  بالگلب محفور

أسمك ..وشما سولف لسانك

تظل ريحة العنبر مأصًله بطرواك

ويظل فوًاح عطرك وسط بستانك

حسافه يبويه حدر التراب تصير

غم حتى التراب الماعرف شانك

حرام الموت يركض بس عله الزينين

ما اكفر ابد ياربي سبحانك

مجروح

 

لا تسولف عالملح يم الجروح
بيهة خوفة جروحي من طاري الملح
جروح گلبي بعدهن حدثات
وگامن بكل موسم يخلفن جرح
ولاتدگ باب الگلب باثنين اديك
بصمة خليت وبعد ماينفتح
سهم مرشوش بملح وبگلبي صار
خله يبرد من بعدهة اطلب صلح
وك احفرت اسمك بالدليل
وحسبت من گلبي مااظن تنمسح
ببستان العشگ چنت انه طير
ليش تسويها ظلمه وانه مكسور الجنح
اشگد غشيم وصدگت وجه الظلام
مادريت بشمعه وجهك ينفضح
لو عمت عيني وضوه العالم باديك
ما اريدن يطلع عله عيوني الصبح

************

شعر بقلم لؤي الأسدي

 

لا يا صديقي

الگلب الابيض لا تلچًمه ارجوك

لا يحمل عتب ولا يتحمًل الصدمه

على الحلوة والمرًه مشيت وياك

ذايب مثل شمعه بساعه العتمه

چنت شايل خلگ ما شاله حتًى الهور

يشگ صدره البلم وما عاتبه بكلمه

جبتهه وياك ضحكه وسالفه وطيب

ليش من الشفاه تموًت البسمه

غشيم انه وزرعتك ردت احصدك عود

لا خضًر العود ولا شفت نعمه

على اول نفس هدًيت خنًاگ

وانه انطر هواك وانطر النسمه

تره القدًاح عطره يفوح للدوم

لو ينداس بالرجلين هم يستاهل الشمًه

والصديج الزين وين تريد تلگاه

لو هدًه كواسج والبحر ظلمه

ما رايد اجرحك بس احاچيك

وما اكثًر الكلام وهيه بس كلمه

شيرجعه الرطب لو طاح بالرجلين

من عين العثگ لو طاح شيلمًه

****************************

شعر بقلم لؤي الأسدي